حيااكم الله
شلونكم اني الحسن قاسم من بغداد عمري 23 سنه تخرجت العام سنه 2020 من كلية الهندسة قسم الحاسبات بعد ما تخرجت من الجامعة
دورت على شغل ايً كان نوع الشغل بس كون يجيبلي دخل مادّي جنت اقبل بي ف المهم اشتغلت بهواي مجالات مثلا اشتغلت بالكيبل الضوئي و بالموبايلات وبالملابس وكذلك فترة اشتغلت بصيدلية ف بالنهاية ورة ما اشتغلت كل هاي الشغلات كعدت كلت خ اجمع الشغل الي مشتغلة واسوي cv اجيت كتبت الشغلات الي مشتغلهن صح هواي مهارات صارت بالسيرة الذاتيه مالتي بس جانت المفاجأة انه ولا شغلة الهة علاقة بالثانية وكل ما اريد اقدم ع وظيفة الكة السيفي مالتي ميطابق الشروط المطلوبة ومو شي غريب لان اني ممركز وقتي ع شي واحد وانما مشتت باكثر من مجال
اسف لأني طولت عليكم بقصتي هههه المهم قررت انه بعد ما اضيع وقتي باشياء متمد بعضها بصلة ولازم اختص بمجال معين وابقى اطور من نفسي بهذا المجال وبعد ما قررت هيج اول فكرة اجتي ببالي هي البرمجة لاني كنت احبهة نوعاً ما بس ما متعمق بيهة والسبب يرجع للجامعة الي هي جانت تصعب الموضوع وتدرسنا اشياء متفيدنا بحياتنا اليومية المهم تخرجت من الجامعة امتلك فقط اساسيات بسيطة عن الحاسبات والبرمجة
بالبداية دخلت مجال الشبكات وحاولت ادرس كورس CCNA ولكن للاسف درست فترة ومليت وبعدين درست MYSQL وهو يخص قواعد البيانات وكذلك فترة وعفته وخلال هذه الفترة الي ادرس واترك ... اني اندب حظي ليش ماكو شغل بالشركات وليش ميشغلوني يدورون واسطات وكذا من هذا الكلام المحبط الى ان يوم من الايام شفت حلقة احمد البشير ملتقي بشاب لطيف اسمه مرتضى التميمي يشتغل بشركة فيسبوك وبدت قصة التغيير ويه هذا الشاب تابعته ع انستا ورة فترة من متابعتي اله نشر انه كان يوم عيد ميلادة ويريد متابعيه يعايدوا بطريقة غريبة من نوعها وهي انو يشاركون بتحدي 29 يوم والي هو تحدي تطوير ذاتي اشتركت بهذا التحدي بانه اتعلم لغة بايثون لان اني بالاخير حبيت مجال الذكاء الاصطناعي وهذي اللغة ممكن تكون بداية اساس لهذا المجال وبديت ويه التحدي اتعلم من قناة ع يوتيوب ويوم ورة يوم جنت اتعلم واحاول اقضي وقت اكثر بالدراسة اكو فترات اجتي كان يصيبني الاحباط ولكن كدرت استمر للنهاية الى هذا اليوم وبعد ما خلص التحدي اني مستمر التحدي ويه نفسي واطور نفسي بالبايثون تعلمت كل شيء يخص اساسيات بايثون وشنو يعني( string ,flout,int,bool,fun,class,loop,break,if ,while ) وبعد اشياء مدتخطرر ببالي وحاليا بديت اتعلم لغة php ,html صار عندي نوع من الروتين انه لازم كل يوم اكعد ادرس بحيث احس انو مقصر بشي ويه نفسي اذا ما تعلمت شي جديد باليوم
واكيد ان شاء الله راح ابقى مستمر بتعلم اشياء جديدة تطورني
بالنهاية شكراً لكل شخص قرأ هذا كلامي
وشكراً لمرتضى والكادر الي خلف الكواليس
وشكراً لنفسي لانني بعدني مستمر
بوسااات
تعليقات
إرسال تعليق